Масква будзе адмоўна рэагаваць у выпадку грамадзкіх непарадкаў у Беларусі

Расейскі міністар абароны Сяргей Іваноў назваў прэзыдэнта Аляксандра Лукашэнку самым папулярным палітыкам у Беларусі. Заява, якую распаўсюдзілі ўсясьветныя інфармацыйныя агенцтвы, зробленая сёньня, у нядзелю, у Мюнхене ў часе 42-й канфэрэнцыі па пытаньнях міжнароднай бясьпекі. Сяргей Іваноў заявіў таксама, што ня мае ніякага сумневу ў тым, што Лукашэнка пераможа ў маючых адбыцца ў сакавіку прэзыдэнцкіх выбарах.
Паводле расейскага міністра, Масква будзе адмоўна рэагаваць у выпадку нейкіх грамадзкіх непарадкаў у Беларусі, падобных да тых, што адбыліся ў іншых краінах СНД. “Але мы мусім зрабіць усё, каб гэтага не было”, удакладніў Іваноў у часе свайго выступу на міжнароднай канфэрэнцыі.
Пазыцыя Сяргея Іванова выклікала крытыку з боку намесьніка дзяржсакратара ЗША Робэрта Зэліка і некалькіх амэрыканскіх сэнатараў. Яны нэгатыўна выказаліся адносна ціску Масквы на суседнія постсавецкія краіны і таго рэгрэсу, які назіраецца ў Расеі ў пытаньні дэмакратызацыі грамадзтва.
Кіраўнік нямецкага замежнапалітычнага ведамства Франк-Вальтэр Штайнмаер назваў Расею “важным стратэгічным партнэрам Эўропы ў пытаньнях бясьпекі”. Напярэдадні, у часе сустрэчы ў Бэрліне зь лідэрам беларускай апазыцыі Аляксандрам Мілінкевічам, спадар Штайнмаер надаў значэньне існаваньню “добрых стасункаў паміж Беларусьсю і Расеяй”, аднак пры гэтым падкрэсьліў “гатовасьць Нямеччыны і Эўразьвязу падтрымаць Беларусь на шляху дэмакратызацыі”.